Deklarata e Novak Djokovic në “French Open” kundër Kosovës nuk ka thyer asnjë rregull sipas Federatës Ndërkombëtare të Tenisit.

“Kosova është zemra e Serbisë”, ishte mesazhi i tenistit serb, pas fitores në raundin e parë.

Ky koment është cilësuar si i rregullt nga ITF, sepse rregullorja e Grand Slam nuk ndalon deklaratat politike.

Tenisti, i cili renditet i treti në botë shkroi në kamerë mesazhin kundër Kosovës, në po të njëjtën ditë që u plagosën 30 ushtarë të NATO-s, nga protestuesit serbë.

“Sjellja e lojtarëve në një ngjarje Grand Slam vendoset nga rregullorja e administruar nga organizatori dhe rregullatori përkatës. Nuk ka asnjë dispozitë në këtë që ndalon deklaratat politike,” tha një zëdhënës i ITF.

Djokovic e mbrojti veprimin e tij gjatë një interviste të dhënë për media serbe, duke thënë se Kosova është “djepi, kalaja” e Serbisë.

Federata e Tenisit e Kosovës të martën akuzoi 36-vjeçarin për përkeqësimin e një situate tashmë të tensionuar, derisa Komiteti Olimpik i Kosovës kërkoi të hapet procedurë disiplinore për promovimin e propagandës së serbisë./Arbresh.info/